कराड शहराला परत विकासाच्या रस्त्यावर आणण्यासाठी काँग्रेसलाच संधी द्यावी; माजी मुख्यमंत्री पृथ्वीराज चव्हाण

कराड शहराला परत विकासाच्या रस्त्यावर आणण्यासाठी काँग्रेसलाच संधी द्यावी; माजी मुख्यमंत्री पृथ्वीराज चव्हाण

कराड, दि. 27 - कराड नगरपालिका निवडणुकीच्या अनुषंगाने प्रभाग क्र. 5 मधील काँग्रेस उमेदवारांच्या प्रचारार्थ माजी मुख्यमंत्री पृथ्वीराज चव्हाण यांच्या उपस्थितीत कोपरा सभा पार पडली. कराड शहराला गेली अनेक वर्षे ठेकेदारांच्या विळख्यातून मुक्त करण्यासाठी ही निवडणूक निर्णायक असल्याचे प्रतिपादन पृथ्वीराज चव्हाण यांनी केले.

या वेळच्या निवडणुकीत काँग्रेस पक्षाने पहिल्यांदाच कराड नगरपालिकेत हाताच्या चिन्हावर उमेदवार उभे केले आहेत. या आधी स्थानिक आघाड्यांच्या माध्यमातून निवडणूक लढविली जात होती.  प्रभाग क्र. 5 मधील काँग्रेसच्या अनुभवी उमेदवार अर्चनाताई पाटील या याआधी नगराध्यक्षा राहिलेल्या असून विकासकामांचा ठसा उमटविणाऱ्या लोकप्रिय नेत्या म्हणून त्यांची ओळख आहे. त्यांच्यासोबत पक्षाने तरुण आणि तडफदार उमेदवार योगेश लादे यांच्यावर विश्वास दाखवून त्यांना उभे केले आहे. अनुभवी नेतृत्व आणि उत्साही युवकशक्ती अशी भक्कम शक्ती या प्रभागात उतरवली असल्याचे पृथ्वीराज चव्हाण यांनी नमूद केले.

यावेळी बोलताना पृथ्वीराज चव्हाण म्हणाले, “कराड शहराने ठेकेदारशाही व स्वार्थी राजकारणाना धडा शिकविण्यासाठी तसेच सर्वधर्म समभावाची भावना शहरात रुजविण्यासाठी हि निवडणूक निर्णायक आहे. शहराला परत विकासाच्या रस्त्यावर आणण्यासाठी काँग्रेसलाच संधी द्यावी. विशेषतः नगराध्यक्ष पदाचे उमेदवार झाकीर पठाण यांना प्रचंड मताधिक्याने विजयी करा, हा कराडचा विकासमार्ग ठरेल.”

कार्यक्रमास नगराध्यक्ष पदाचे उमेदवार झाकीर पठाण, कराड शहर काँग्रेस अध्यक्ष अमित जाधव, आसामहून आलेले निरीक्षक इकबाल अहमद, उमेदवार अर्चनाताई पाटील, योगेश लादे, आनंदराव लादे, प्रदीप जाधव, इंद्रजीत चव्हाण, सौ. मारुलकर आदींसह नागरिक मोठ्या संख्येने उपस्थित होते.

सभेच्या शेवटी सर्वांनी काँग्रेसच्या हाताच्या चिन्हाला मतदान करून कराड शहराला ठेकेदारांच्या सावटातून मुक्त करण्याचा व शांत व सदभावनेच्या वातावरणासाठी संकल्प व्यक्त केला. प्रभाग क्र. 5 मध्ये या सभेमुळे काँग्रेसच्या प्रचाराला मोठी गती मिळाल्याचे राजकीय वर्तुळात दिसून येत आहे.