राष्ट्रवादीच्या कराड दक्षिण तालुका अध्यक्षपदी डॉ. सुधीर जगताप यांची निवड.

कराड - कराड दक्षिण तालुकाध्यक्ष डॉक्टर सुधीर जगताप यांचा सत्कार करताना जिल्हाध्यक्ष बाळासाहेब सोळसकर व पदाधिकारी...

राष्ट्रवादीच्या कराड दक्षिण तालुका अध्यक्षपदी डॉ. सुधीर जगताप यांची निवड.

कराड, दि. 10 - स्थानिक स्वराज्य संस्थांच्या निवडणुकांच्या पार्श्वभूमीवर जिल्ह्यात राष्ट्रवादी काँग्रेस पक्ष (अजितदादा पवार गट) मजबूत करण्यासाठी जिल्हास्तरावर पदाधिकाऱ्यांच्या निवडी करण्यात येत असून कराड दक्षिण तालुका अध्यक्षपदी डॉ. सुधीर जगताप (वडगाव हवेली), महिला अध्यक्षपदी दिपाली जाधव (सैदापूर) आणि युवक अध्यक्षपदी महादेव शिंदे (कोळीवाडी) यांची निवड केल्याचे सातारा जिल्हा राष्ट्रवादी काँग्रेसचे जिल्हाध्यक्ष बाळासाहेब सोळसकर यांनी येथे झालेल्या पत्रकार परिषदेत जाहीर केले. यावेळी  सादिक इनामदार, धनाजी काटकर, जितेंद्र डुबल या पदाधिकाऱ्यांसह कार्यकर्ते मोठ्या संख्येने उपस्थित होते. यावेळी नूतन पदाधिकाऱ्यांचा उपस्थित मान्यवरांच्या हस्ते सत्कार करण्यात आला.

याप्रसंगी जिल्हाध्यक्ष सोळसकर म्हणाले, राज्याचे मदत व पुनर्वसन मंत्री मकरंद पाटील आणि खा. नितीनकाका पाटील यांच्या उपस्थितीत तालुक्यात लवकरच कार्यकर्ता मेळावा घेण्यात येणार असून, कराड उत्तर मधील निवडी ही जाहीर करण्यात येणार असल्याचे त्यांनी सांगितले. 

स्व. विलासराव पाटील - वाठारकर यांच्यामुळे पक्षाला कराड दक्षिणमध्ये मोठे ताकद मिळाली होती. त्यानंतर पक्षीय बदलामुळे अनेक फेरबदल झाले आहेत. त्यामुळे कराड दक्षिणमध्ये राष्ट्रवादीची ताकद काहीशी कमी झाली होती. पूर्वी, सातारा जिल्हा परिषद आणि पंचायत समितीच्या निवडणुका स्व. विलासकाकांच्या नेतृत्वाखाली होत होत्या. आता राज्याचे उपमुख्यमंत्री अजितदादा पवार यांच्या नेतृत्वाखाली उदयसिंह पाटील यांच्या राष्ट्रवादी पक्षप्रवेशामुळे दक्षिणेत राष्ट्रवादीची ताकद वाढली आहे. त्यामुळे पक्षाला पुन्हा गत वैभव मिळेल, असा विश्वास त्यांनी व्यक्त केला.

दरम्यान कराड नगरपालिकेच्या निवडणुकीसाठी विजयसिंह यादव यांच्यावर जबाबदारी दिली असून एड. उदयसिंह पाटील- उंडाळकर पाटील यांच्या मार्गदर्शनाखाली पुढील निर्णय घेण्यात येतील, असे त्यांनी शेवटी सांगितले.