कराड नगरपालिका नगरवाचनालयातर्फे नवरात्र उत्सवात; ९३ व्या शारदीय व्याख्यानमाला
कराड नगरपालिका नगरवाचनालयातर्फे नवरात्र उत्सवात; ९३ व्या शारदीय व्याख्यानमाला
कराड, दि. 21 - कराड नगरपरिषदेच्या नगरवाचनालयाच्या वतीने प्रतिवर्षी शारदीय व्याख्यानमालेचा उपक्रम राबविला जातो. सन १९३२ पासुन ही व्याख्यानमाला अविरतपणे सुरु असुन यंदा ही शारदीय व्याख्यानमाला ९३ व्या वर्षात पदार्पण करीत आहे. दिनांक २२ सप्टेंबर २०२५ पासुन या शारदीय व्याख्यानमालेस प्रारंभ होत आहे. कराडचे सांस्कृतिक, वैचारिक वैभव, शैक्षणिक संस्कारक्षम व्यासपीठ म्हणुन या व्याख्यानमालेने नावलौकीक मिळविला आहे.
१६८ वर्षाची परंपरा जपणारे हे नगरवाचनालय आज कराड शहराची शान बनलेली आहे. बुध्दीवंतांची गरज तर वाचनवेड्या पुस्तकप्रेमी वाचकांची तहान भागविण्याचा झरा बनली आहे. या वाचनालयाची स्थापनाच १८५७ ची, हे वर्षच मुळात अखंड भारताच्या दृष्टीने ऐतिहासिक आणि संस्मरणीय वर्ष. या १८५७ मध्ये स्थापन झालेले हे नगरवाचनालय आजही आपल्या अखंड सेवेने तत्परतेने, विविधतेने, वाचकांची, जिज्ञासूंची, अभ्यासूंची व्याख्यानमाला रसिकांची भूक भागविते आहे.
या व्याख्यानमालेत साहित्य, संगीत, कला, क्रीडा, लोककला राजकारण काव्य, कथाकथन, धार्मीक, अध्यात्मिक, इत्यादी विविध विषयावरील व्यासंगपूर्ण अभ्यासू व नामवंत वक्त्यानी गेल्या ९२ वर्षात ७१७ हून अधिक व्याख्यात्यांनी आपली व्याख्याने सादर केलेली आहेत. या थोर विचारवंताचे विचार कराडकरांच्या चिरंतर स्मृतीत कायमचे राहिले आहेत.
आजपर्यंत या शारदीय व्याख्यानमालेत राज्यातील मान्यवर विचारवंतानी व वक्त्यांनी आपले विचार मांडून या व्यासपीठास ज्ञानपीठाचा दर्जा प्राप्त करून दिला आहे.
या व्याख्यानमालेबरोबरच कराड नगरपरिषदेचे सार्वजनिक ग्रंथालय एक आदर्श ग्रंथालय म्हणून नावलौकिक मिळविला आहे. डॉ. बाबासाहेब आंबेडकर उत्कृष्ठ ग्रंथालय पुरस्काराने सन्मानित झालेले हे ग्रंथालय या शारदीय व्याख्यानमालेच्यारूपाने एक सांस्कृतिक वारसा जोपासत आहे.
सदरील व्याख्यानमालेस श्रोत्यांची मोठ्या प्रमाणात गर्दी असते. कराडला येवुन शारदीय व्याख्यानमालेत आपली हजेरी लावण्यातही वक्त्यांना आपला गौरवच वाटतो, म्हणुन नामवंत वक्तेही या शारदीय व्याख्यानमालेत सहभागी होण्यास उत्सुक असतात.
सोमवार दिनांक २२ सप्टेंबर २०२५ रोजी व्याख्यानमालेचा शुभारंभ मा.सौ. अंजली धानोरकर, मा. उपजिल्हाधिकारी, छत्रपती संभाजीनगर यांच्या 'माणुसकी हरवतेय का?' या व्याख्यानाने होणार आहे.
मंगळवार दिनांक २३ सप्टेंबर २०२५ रोजी सौ. दिपाली केळकर, वृत्तनिवेदिका, मुंबई दूरदर्शन सह्याद्री वाहिनी, मुंबई. यांचे 'स्त्रीधन'
बुधवार दिनांक २४ सप्टेंबर २०२५ रोजी प्रा. डॉ. विनोद बाबर, प्रसिध्द व्याख्याते, उंब्रज यांचे 'संकटे त्यांच्या वाटयाला येतात ज्यांची पेलायची ताकद असते',
गुरुवार दिनांक २५ सप्टेंबर २०२५ रोजी सौ. लीना बोकील, खगोलशास्त्र आणि अवकाश अभ्यासक, (NASA) पुणे यांचे 'इस्त्रोचा प्रवास व चंद्रयान 3 मोहिम'
शुक्रवार दिनांक २६ सप्टेंबर २०२५ रोजी श्री. केतन पुरी, पुरातत्व व इतिहास संशोधक, सुप्रसिध्द लेखक, पुणे यांचे 'छत्रपती शिवाजी महाराज आणि मराठा साम्राज्य',
शनिवार दिनांक २७ सप्टेंबर २०२५ रोजी पद्मश्री. श्री. अच्युत पालव, सुप्रसिध्द सुलेखनकार, मुंबई यांचे 'सुलेखन कला तंत्र आणि मंत्र' (प्रकट मुलाखत),
रविवार दिनांक २८ सप्टेंबर २०२५ रोजी डॉ. विजयकुमार फड (IAS), सेवानिवृत्त अतिरिक्त आयुक्त / अप्पर आयुक्त तथा सचिव मराठवाडा विकास महामंडळ, छत्रपती संभाजीनगर यांचे 'आनंदी जीवनाचे रहस्य'
सोमवार दिनांक २९ सप्टेंबर २०२५ रोजी श्री. अतुल कहाते, माहिती तंत्रज्ञान क्षेत्रातील नामवंत तज्ञ, पुणे यांचे 'आर्टिफिशियल इंटेलिजन्स (A.I.) चे युग',
मंगळवार दिनांक ३० सप्टेंबर २०२५ रोजी श्री. योगेश आलेकरी, सर्टिफाईड माउंटेनर, मुंबई यांचे 'मुंबई-लंडन - मुंबई बाईकवरुन केलेला साहसी प्रवास (स्लाईड शो सह विवेचन)',
बुधवार दिनांक १ ऑक्टोबर २०२५ रोजी प्रा. श्री. संदिप जगताप, सुप्रसिध्द कवी, व्याख्याते, नाशिक यांचे 'कविता अन बरंच काही...' अशाप्रकारे एकूण १० व्याख्याने आयोजित करण्यात आलेली आहेत.
या सर्व व्याख्यानास कराडच्या रसिक श्रोतृवृंदानी, विद्यार्थीवर्गानी बहुसंख्येने उपस्थित राहून व्याख्यांनाचा लाभ घ्यावा असे आवाहन प्रशासक तथा मुख्याधिकारी प्रशांत व्हटकर यांनी केली आहे. वरील सर्व व्याख्याने यशवंतराव चव्हाण स्मृतिसदन (टाऊन हॉल) येथे दररोज सायं. ६.३० वाजता होणार आहेत.
Comments
Post a Comment