अवैध ठरलेल्या मानसिंगराव जगदाळे, निवास थोरात यांच्यासह दहा जणांचे अपील दाखल.

अवैध ठरलेल्या मानसिंगराव जगदाळे, निवास थोरात यांच्यासह दहा जणांचे अपील दाखल. 

सह्याद्री सहकारी कारखाना निवडणूक.

कराड, दि. 11 (प्रतिनिधी)  सह्याद्री सहकारी साखर कारखान्याच्या निवडणुकीत प्रथमच 251 उमेदवारांनी अर्ज दाखल केले होते. त्यापैकी छाननी नंतर 205 अर्ज उरले होते. सत्ताधारी अध्यक्ष बाळासाहेब पाटील यांचे समर्थक माजी जिल्हा परिषद सदस्य मानसिंगराव जगदाळे व काँग्रेसचे तालुकाध्यक्ष निवास थोरात या दोघांसह अवैध ठरलेल्या दहा जणांनी पुण्यात प्रादेशिक सहसंचालक यांच्याकडे अपील दाखल केले असून त्यावर गुरुवार दिनांक १३ मार्च २५ रोजी दुपारी १ वाजता सुनावणी होणार आहे.

सह्याद्री सहकारी साखर कारखाना मर्यादित यशवंतनगर तालुका कराड संचालक मंडळ निवडणूक २०२५ निवडणुकीच्या प्रक्रियेत 10 उमेदवारांनी आपले अर्ज अवैध ठरवल्याच्या विरोधात प्रादेशिक सहसंचालक (साखर), पुणे विभाग यांच्याकडे दादा मागितली आहे त्यामुळे या निवडणुकीला वेगळाच रंग चढू लागला आहे. दरम्यान आज ११ मार्च अखेर एकाही उमेदवाराने अर्ज मागे घेतलेला नाही. 

निवडणूक उमेदवारी अर्ज छाननी मध्ये २०५ उमेदवारांचे अर्ज वैध ठरले आहेत. तर २९ उमेदवारांचे अर्ज अवैध ठरले आहेत. अवैध ठरलेल्या १. बाबुराव जगन्नाथ पवार, बेलवडे- हवेली (गट क्रमांक २-तळबीड), २. दिलीप हनुमंत कुंभार, तळबीड (इतर मागास वर्ग राखीव), ३. सिंधुताई दादासो जाधव, पाडळी- हेळगाव (महिला राखीव), ४. जयश्री पृथ्वीराज पाटील, सुपने (महिला राखीव), ५. अधीकराव पांडुरंग माळी, सुपने (इतर मागास वर्ग राखीव), ६. संदीप यशवंत पाटील, उत्तर तांबवे (गट क्रमांक १-कराड), ७. श्रीकांत माधवराव जाधव, गोवारे ( गट क्रमांक ४-कोपर्डे हवेली), ८. प्रतापराव गणपतराव यादव, कडेपूर- कडेगाव (गट क्रमांक १-कराड), ९. मानसिंगराव वसंतराव जगदाळे, मसूर (गट क्रमांक ५-मसूर), १०. निवास आत्माराम थोरात, नडसी( गट क्रमांक ४-कोपर्डे हवेली)

या १० उमेदवारांनी प्रादेशिक सहसंचालक (साखर), पुणे विभाग, पुणे, साखर संकुल, शिवाजीनगर यांचे समोर निवडणूक निर्णय अधिकारी यांचे उमेदवारी अर्ज अवैध ठरविण्याच्या निर्णयाविरुद्ध कलम १५२(अ) अन्वये अपील दाखल केले आहेत. त्यावर गुरुवार दिनांक १३ मार्च २५ रोजी दुपारी १ वाजता सुनावणी होणार आहे. सदर सुनावणीसाठी उपस्थित राहून म्हणणे दाखल करण्यासाठी उमेदवारी अर्ज वैध ठरलेल्या सर्व उमेदवारांना नोटीस बजावण्यात आली आहे. तसेच सदर अपिलबाबत नोटीस व अपील मेमो निवडणूक अधिकारी यांचे कार्यालयात सूचना फलकावर लावण्यात आले आहेत. सदर सुनावणीची सर्व उमेदवारांनी नोंद घ्यावी असे आवाहन करण्यात आले आहे.

दाखल अपिलावर सुनावणी होऊन निर्णय होणार आहेत. त्यानंतर उमेदवारीबाबत चित्र स्पष्ट होईल. दिनांक २१ मार्च रोजी दुपारी तीन वाजेपर्यंत स्वतः उमेदवारास स्वतः किंवा लेखी प्राधिकृत केलेल्या सूचका मार्फत उमेदवारी अर्ज मागे घेता येणार आहेत.