यशवंतराव चव्हाण कृषी प्रदर्शन उद्या पासून होणार खुले...

यशवंतराव चव्हाण कृषी प्रदर्शन उद्या पासून होणार खुले...

सायंकाळी शेतकऱ्यांच्या हस्ते औपचारीक उद्धघटन ; चार दिवस चालणार कृषीचा जागर

कराड, दि. 5 (प्रतिनिधी) : शेती उत्पन्न बाजार समितीच्यावतीने भरविण्यात येणारे १९ वे राज्यस्तरीय यशवंतराव चव्हाण कृषी, औद्योगिक व पशुपक्षी प्रदर्शन आज (शुक्रवार)पासून खुले होणार आहे. अशी माहिती बाजार समितीचे सभापती प्रकाश पाटील, उपसभापती संभाजी काकडे यांनी दिली. आजपासून १० डिसेंबर या चार दिवसात कृषीचा जागर पहायला मिळणार आहे. कमी कालावधीत बाजार समितीने शासन कृषी विभाग व सह यंत्रणांच्या मदतीने प्रदर्शनाची तयारी पूर्ण केली आहे. चार दिवस चालणाऱ्या या प्रदर्शनामध्ये शेती, औद्योगिक व पशुपक्षी, महिला बचतगट, आरोग्य या क्षेत्रातील पर्वणी पहायला मिळणार आहे.

माजी सहकार मंत्री (कै.) विलासराव पाटील - उंडाळकर यांच्या संकल्पनेतून या प्रदर्शनाची १८ वर्षापूर्वी मुहूर्तमेढ रोवली गेली. आजतागायत अखंडपणे हे प्रदर्शन भरवले जात आहे. महाराष्ट्राचे पहिले मुख्यमंत्री (स्व.) यशवंतराव चव्हाण यांच्या पुण्यतिथीनिमित्त दरवर्षी २४ नोव्हेंबर ते २८ नोव्हेंबर या कालावधीत प्रदर्शन भरवण्याची परंपरा आहे. परंतु यंदा या कालावधीत महाराष्ट्र विधानसभा निवडणुका असल्याने आचारसंहितेमुळे प्रदर्शनाच्या वेळेत बदल करण्यात आला.

बदललेल्या तारखेनुसार आज (शुक्रवार)पासून हे प्रदर्शन पाहण्यासाठी खुले होत असून, शेती उत्पन्न बाजार समिती, शासन कृषी विभाग व जिल्हा परिषद, सातारा आदींच्या मार्गदर्शनाखाली डायनॅमिक इव्हेंटचे धीरज तिवारी यांच्या यंत्रणेने स्वा. सै. शामराव पाटील फळे व भाजीपाला (बैल बाजार) आवारात दिमाखदार मंडप उभा केला आहे. 

आज (शुक्रवारी) दुपारी ऊस पीक स्पर्धा व प्रदर्शन होईल. यामध्ये नावीन्यपूर्ण कृषी आयुधे, औजारे निर्मिती स्पर्धा होणार आहेत. सायंकाळी ४ वाजता प्रगतशील शेतकऱ्यांच्या हस्ते औपचारीक उद्धघटन होईल. प्रदर्शनाच्या वेळेत बदल होवूनही यंदा प्रदर्शनात चारशेहून अधिक स्टॉल सहभागी झाले आहेत. 

शनिवारी (दि. ७) सकाळी दहा वाजता सातारा जिल्हा मध्यवर्ती सहकारी बँकेचे अध्यक्ष खा. नितीन पाटील यांच्या हस्ते प्रदर्शनाचे उद्घाटन होईल. कराड उत्तरचे नवनिर्वाचित आ. मनोज घोरपडे अध्यक्षस्थानी आहेत. राज्याचे माजी मुख्यमंत्री पृथ्वीराज चव्हाण, माजी राज्यपाल श्रीनिवास पाटील, रयत सहकारी साखर कारखान्याचे चेअरमन अॅ ड. उदयसिंह पाटील - उंडाळकर हे प्रमुख अतिथी आहेत. 

भाजपचे जिल्हाध्यक्ष धैर्यशील कदम, भाजपा किसान मोर्चाचे प्रदेश सरचिटणीस रामकृष्ण वेताळ, कराड तालुका खरेदी - विक्री संघाचे चेअरमन अनिल मोहिते, कोयना सहकारी बँकेचे अध्यक्ष रोहित पाटील, कोयना दूध संघाचे अध्यक्ष लक्ष्मण देसाई, फलटणच्या यशवंत सहकारी बँकेचे अध्यक्ष महेशकुमार जाधव, स्वा. सै. शामराव पाटील नागरी सहकारी पतसंस्थेचे चेअरमन शहाजी शेवाळे हे प्रमुख अतिथी आहेत.

राज्याचे पणन संचालक डॉ. विकास रसाळ, जिल्हाधिकारी जितेंद्रसिंह डूडी, कृषी पणन मंडळाचे कार्यकारी संचालक संजय कदम, जिल्हा परिषदेच्या मुख्य कार्यकारी अधिकारी याशनी नागराजन, जिल्हा पोलिस अधीक्षक समीर शेख, उप वनसंरक्षक आदिती भारद्वाज, विभागीय कृषी सहसंचालक उमेश पाटील, पणन मंडळाचे उप सरव्यवस्थापक डॉ. सुभाष घुले, जिल्हा अधीक्षक कृषी अधिकारी भाग्यश्री फरांदे, आत्माचे प्रकल्प संचालक अजय शेंडे, जिल्हा परिषदेचे कृषी विकास अधिकारी गजानन ननावरे यांच्यासह विविध क्षेत्रातील मान्यवर मोठ्या संख्येने उपस्थित राहणार आहेत. 

शनिवारी (दि. ७) दुपारी साडेबारा वाजता ऊस पीक व केळी घड प्रदर्शन व स्पर्धा होतील. रविवारी (दि. ८) फुले प्रदर्शन स्पर्धा, गाय, म्हैस, बैल स्पर्धा होणार आहेत. सोमवारी (दि. ९) फळे व श्वान प्रदर्शन तसेच स्पर्धा होतील. मंगळवारी (दि. १०) भाजीपाला पिक, शेळी, मेंढी व पक्षी प्रदर्शन व स्पर्धा होणार आहेत. त्यादिवशी सायंकाळी सदगुरू गाडगे महाराज महाविद्यालयाचे प्राचार्य डॉ. मोहन राजमाने यांच्या हस्ते शेतीनिष्ठ शेतकरी पुरस्कार वितरण, स्पर्धा बक्षीस वितरण समारंभ तसेच प्रदर्शनाचा समारोप होणार आहे.

प्रदर्शनातील कृषी, औद्योगिक, पशू - पक्षी दालनास भेटी देवून शेतकऱ्यांनी आपली प्रगती साधण्यासाठी प्रयत्न करावेत. असे आवाहन सभापती, उपसभापती व सर्व संचालकांनी केले आहे.