ऊसतोड सुरू असताना बिबट्याची नवजात बछडी सापडली....

ऊसतोड सुरू असताना बिबट्याची नवजात बछडी सापडली....

कराड दि.19-हिंगनोळे ता.कराड येथील शेतकरी सौ विद्या निवासराव माने यांच्या शेतात उसतोड सुरू असताना दुपारी बिबट्याची दोन पिल्ले सरीत सापडली. वनविभागाने सायंकाळी त्या पिल्लांची व आईची भेट घडवून आणली.

बिबट्याची पिल्ली सापडली असल्याची माहिती वनपाल सागर कुंभार यांना समजताच तातडीने घटनस्थळी जाऊन पिल्ले ताब्यात घेतली. सदर बिबट्याची पिल्लं ही नवजात होती व अजून डोळे उघडायची होती. मादी बिबट्या ही जवळपासच असणार हे ओळखून वाईल्ड लाईफ रेस्कूअर्स कराड च्या टीमला पाचारण करून मादी व पिल्लू यांचे पुनर्मिलन घडवून आणण्याचा निर्णय परिक्षेत्र वनाधिकारी तुषार नवले यांनी घेतला.

संध्याकाळी 5.30 वाजता विशिष्ट व्यवस्था करून दोन्ही पिल्ले क्रेट मध्ये सापडलेल्या ठिकाणी कॅमेरे लाऊन पुन्हा ठेवण्यात आले. मादी बिबट्या संध्याकाळी 7.30 वाजता येऊन आपल्या एक पिल्लू अलगदपणे घेऊन गेली. सदर पहिले पिल्लू सुरक्षित ठिकाणी ठेवून पुन्हा दुसऱ्या पिल्लूसाठी मादी बिबट्या 8.20 वाजता आली व दुसरे पिल्लू ही सुरक्षित घेऊन गेली.

वनक्षेत्रपाल तुषार नवले, वनक्षेत्रपाल परिविक्षाधीन सुजाता विरकर, मानद वन्यजीव रक्षक रोहन भाटे सह सदर कारवाई मध्ये वनपाल सागर कुंभार , वनरक्षक सचिन खंडागळे, मेजर अरविंद जाधव, वनसेवक शंभूराज माने यांनी सहभाग घेतला. तर वाईल्ड लाईफ रेस्कूअर्स कराडचे अजय महाडीक, गणेश काळे, रोहित कुलकर्णी, रोहित पवार, अनिल कोळी, सचिन मोहिते यांनी मोलाची भूमिका पार पाडली .