स्वच्छता पंधरवडा-कराडात शनिवारी नगरपरिषदेकडून जनजागृती रॅली तर रविवारी स्वच्छता महाअभियानाचे आयोजन...

स्वच्छता पंधरवडा-कराडात शनिवारी नगरपरिषदेकडून जनजागृती रॅली तर रविवारी स्वच्छता महाअभियानाचे आयोजन...

कराड दि. 14 (प्रतिनिधी) देशभरात 15 सप्टेंबर ते 2 ऑक्टोंबर 2023 या कालावधीत स्वच्छता पंधरवडा अभियान राबवण्यात येणार आहे. या पार्श्वभूमीवर कराड नगर परिषदेच्या वतीने शनिवार दि. 16 सप्टेंबर रोजी दत्त चौकातून स्वच्छता पंधरवडा जनजागृती रॅलीचे आयोजन करण्यात आले आहे. तर रविवारी 17 सप्टेंबर रोजी कृष्णा घाटावर नदीपात्रात स्वच्छता महाअभियान राबवण्यात येणार असल्याची माहिती मुख्याधिकारी संजय गायकवाड यांनी दिली.

स्वच्छ भारत अभियान 2.0 अंतर्गत केंद्र सरकारने याबाबत जारी केलेल्या आदेशानुसार 15 सप्टेंबर ते 2 ऑक्टोबर या कालावधीत स्वच्छता पंधरवडा आयोजित करावयाचे आदेश दिले आहेत. या अभियानाचा एक भाग म्हणून इंडियन स्वच्छता लीग 2.0 चा दुसरा हंगाम व सफाई मित्र यांच्याकरिता सेवा व सुरक्षा शिबिर आयोजित करावयाचे आहे.

इंडियन स्वच्छता लीग 2.0 च्या अनुषंगाने कराड नगरपरिषदेच्या आरोग्य विभागाच्या वतीने शनिवार दि. 16 सप्टेंबर रोजी दत्त चौकातून सकाळी 9 वाजता स्वच्छता पंधरवडा जनजागृती रॅलीचे आयोजन करण्यात आले आहे यामध्ये शहरातील शाळा, महाविद्यालय, स्वयंसेवी संस्था, सामाजिक संस्था, नागरिक नगरपरिषद सर्व अधिकारी कर्मचारी सहभागी होणार आहेत. ही रॅली दत्त चौकातून मेन रोडने चावडी चौक, कन्या शाळा ते नगरपरिषद अशी काढण्यात येणार आहे व नगरपरिषद आवारात रॅलीतील सहभागी सर्वांना स्वच्छता शपथ देण्यात येणार आहे.

रविवार दिनांक 17 सप्टेंबर रोजी सकाळी 7 वाजता प्रीतीसंगम कृष्णा घाट परिसरात महास्वच्छता अभियान राबवण्यात येणार आहे. कृष्णा नदी पात्र स्वच्छता महा अभियान यावेळी राबविण्यात येणार आहे. यामध्ये शहरातील शाळा, महाविद्यालये, स्वयंसेवी संस्था सामाजिक संस्था, नगरपरिषदेचे सर्व अधिकारी कर्मचारी, विविध संघटना सदस्य, शहरातील नागरिक सहभागी होणार आहेत. स्वच्छता पंधरवडा जनजागृती रॅली व स्वच्छता महा अभिनात जास्तीत जास्त नागरिकांनी सहभागी व्हावे असे आव्हान नगरपरिषद आरोग्य विभागाचे आरोग्य अभियंता आर डी भालदार यांनी केली आहे.

दरम्यान या स्वच्छता पंधरवडा अभियानात सहभागी होण्यासाठी नगरपरिषदेच्या वतीने क्यू आर कोड प्रसिद्ध करण्यात आला असून शाळा, महाविद्यालय, स्वयंसेवी संस्था, सामाजिक संस्था, विविध संघटना नागरिक यांनी तो क्यूआर कोड स्कॅन करून या अभियानात सहभागी व्हावे असेही आव्हान भालदार यांनी केले आहे.