शिक्षण मंडळ व टिळक हायस्कूलने देशाच्या जडणघडणीत दिग्गज विद्यार्थी दिले;ना.दीपक केसरकर...

 

शिक्षण मंडळ व टिळक हायस्कूलने देशाच्या जडणघडणीत दिग्गज विद्यार्थी दिले;ना.दीपक केसरकर...

कराड दि.23-विद्यार्थ्यांच्या हृदय व मेंदूपर्यंत पोहोचणारी मातृभाषाच असते. यासाठी विद्यार्थ्यांनी मातृभाषेचा अभिमान बाळगावा. पुढील दहा वर्षात भारत जगातला सर्वात तरुण देश असेल. त्यावेळी भारत जगाचे नेतृत्व करायला सज्ज असेल. शिक्षण मंडळ व टिळक हायस्कूल ही कराडची वैभव स्थाने आहेत. याचा मला सार्थ अभिमान आहे. शिक्षण मंडळाने व टिळक हायस्कूलने देशाच्या जडणघडणीत अनेक दिग्गज विद्यार्थी दिले आहेत. यशवंतराव चव्हाण व पै. खाशाबा जाधव या कराडच्या सुपुत्रांनी महाराष्ट्राचेच नव्हे तर देशाची मान उंचावली असल्याचे गौरोद्गार राज्याचे शालेय शिक्षण मंत्री दीपक केसरकर यांनी काढले.

येथील शिक्षण मंडळ कराड या संस्थेच्या व टिळक हायस्कूलच्या शताब्दी महोत्सवानिमित्त आयोजित सांगता समारंभात ते बोलत होते. अध्यक्षस्थानी शिक्षण मंडळाचे चेअरमन बाळासाहेब कुलकर्णी होते. यावेळी संस्थेचे अध्यक्ष डॉ.अनिल हुद्देदार, व्हाइस चेअरमन अनघा परांडकर, सचिव चंद्रशेखर देशपांडे, सहसचिव राजेंद्र लाटकर, मुख्याध्यापक गोकुळ अहिरे यांची प्रमुख उपस्थिती होते.

ना. केसरकर म्हणाले, महाराष्ट्राची मुले हुशार आहेत त्यांना दर्जेदार शिक्षण मिळाले पाहिजे यासाठी नवीन सरकार कटीबद्ध आहे. विद्यार्थी हाच शिक्षणाचा केंद्रबिंदू मानून त्यांना दर्जेदार शिक्षण उपलब्ध करून देण्याचा आमचा प्रयत्न राहणार आहे. विद्यार्थ्यांना घडवणार्‍या शिक्षकांच्या समस्या दूर झाल्या पाहिजेत ही नवीन सरकारची प्रामाणिक भावना आहे. शिक्षकांचे अनेक प्रश्न प्रलंबित होते ते निकाली काढून 61 हजार शिक्षकांना एकाच वेळी न्याय दिला आहे. प्रत्येक वर्षी अकराशे कोटी याप्रमाणे पुढील पाच वर्षासाठी साडेपाच हजार कोटीची तरतूद शिक्षण क्षेत्रासाठी करण्यात आली आहे. स्वातंत्र्याच्या अग्रभागी असणारे लोकमान्य टिळकांच्या स्मृती जपण्यासाठी टिळक हायस्कूलची स्थापना झाली ही अभिमानाची बाब आहे. तो राष्ट्रीय शिक्षण देण्याचा वसा व देशभक्ती जागृत ठेवण्याचा वसा या शाळेने जोपासला याचे समाधान वाटते.

लोकमान्य टिळकांनी स्वातंत्र्याचे रोपटे लावले त्याची जोपासना करण्यासाठी आजच्या विद्यार्थ्यांनी सतर्क असणे काळाची गरज आहे. सध्या पालक व विद्यार्थी इंग्रजी माध्यमाकडे वळताना दिसत आहेत. जागतिक पातळीवर शिक्षण तंत्रज्ञान आज इंग्रजीमध्ये पाहायला मिळते आहे. मात्र इंग्रजी ही जगाची शिक्षणाची भाषा नाही. जर्मनी सारख्या विकसित देशाने जगाला सर्वोत्कृष्ट शास्त्रज्ञ जरी दिले असले तरी त्यांचे सर्व शिक्षण त्यांच्या मातृभाषातूनच होते. इंग्रजी ही भाषा संपर्काची आणि संवादाची भाषा असली तरी ती जगाची शिक्षणाची भाषा कधीही नव्हती. रशियाने अंतराळात स्वतःचे साम्राज्य निर्माण केले असले तरीही रशियात कोणीही इंग्रजी बोलत नाही. त्यांचा सगळा व्यापार रशियन भाषेतच चालतो. याचाच अर्थ आजच्या विद्यार्थ्यांनी मातृभाषेला प्राधान्य द्यावे व स्वतःचे व्यक्तिमत्व विकसित करून जगावरती राज्य  करण्यासाठी सज्ज व्हावे. जगाला लागणारे सर्व प्रशिक्षित मनुष्यबळ केवळ भारतच पुरवू शकेल असे ही ना.केसरकर म्हणाले.

स्व. यशवंतराव चव्हाण, पै.खाशाबा जाधव, म . रा. कोल्हटकर, न्यायमूर्ती शालिनी फणसळकर असे शेकडो विद्यार्थी टिळक हायस्कूलने घडविले आहेत.ही संस्था केवळ कराडचाच अभिमान नाही तर महाराष्ट्राचा अभिमान आहे. मी शिक्षण मंत्री या नात्याने शिक्षण मंडळवरती लक्ष ठेवणे हे माझे कर्तव्य मानतो. शासन म्हणून मी संस्थेच्या व शाळेच्या पाठीशी सदैव खंबीर उभा राहीन. या वेळी मंत्री महोदयांनी स्वतःचे निधीतून संस्थेसाठी देणगी देण्याचा मानस जाहीर केला. 

या शाळेत शिकलेले यशवंतराव चव्हाण हे महाराष्ट्राचे पहिले मुख्यमंत्री व देशाचे संरक्षण मंत्री होते. चीन भारत युद्धा वेळी अत्यंत बिकट परिस्थितीमध्ये पंडित जवाहरलाल नेहरूंनी तत्कालीन मुख्यमंत्री यशवंतराव चव्हाण साहेबांवर जबाबदारी दिली. संरक्षण क्षेत्रात पहिल्या तीन देशामध्ये भारत तिसऱ्या क्रमांकावर आहे तो केवळ टिळक हायस्कूलमध्ये शिकलेल्या संरक्षण मंत्री यशवंतराव चव्हाण यांच्यामुळेच. कराडच्या या सुपुत्राने देशाच्या संरक्षण क्षेत्राची मान उंचावल्याचा सार्थ अभिमान आहे .शिक्षण मंडळ कराड व टिळक हायस्कूल ही कराडची वैभव स्थानी आहेत याचा सार्थ अभिमान आहे.असे ना.केसरकर म्हणाले.

यावेळी संस्थेच्या विविध शाखातील उज्वल हे संपादन केलेल्या विद्यार्थ्यांचा व मार्गदर्शक शिक्षकांचा सत्कार करण्यात आला .संस्थेचे सचिव चंद्रशेखर देशपांडे यांनी प्रास्ताविक केले .व्हाईस  चेअरमन अनघा परांडकर यांनी परिचय करून दिला. चेअरमन बाळासाहेब कुलकर्णी व संस्थेचे अध्यक्ष डॉ.अनिल हुद्देदार यांनी पाहुण्यांचा सत्कार केला. 

कराड टुडे आॅनलाईन न्यूज व कराड टुडे न्यूज चॅनेलसाठी बातम्या व जाहिरातींसाठी सपंर्क-राजू सनदी, कराड-9822308552, rajusanadi@gmail.com