सभासदांच्या पाठबळामुळे कृष्णा बँकेची आर्थिक स्थिती भक्कम : डॉ. अतुल भोसले...

 

सभासदांच्या पाठबळामुळे कृष्णा बँकेची आर्थिक स्थिती भक्कम : डॉ. अतुल भोसले...

५१ वी वर्षिक सर्वसाधारण सभा उत्साहात; मार्चअखेर ९०० कोटी व्यवसायपूर्तीचे उद्दिष्ट...

कराड, दि. 26- शेतकऱ्यांची हक्काची बँक समजल्या जाणाऱ्या कृष्णा बँकेची आर्थिक स्थिती सभासदांच्या पाठबळामुळे भक्कम आहे. बँकेने गेल्या आर्थिक वर्षात ७३९ कोटींचा व्यवसाय टप्पा पार केला असून, येत्या मार्चअखेर बँकेचा एकूण व्यवसाय ९०० कोटी रुपयांपर्यंत नेण्याचे उद्दिष्ट ठेवण्यात आल्याची माहिती कृष्णा सहकारी बँकेचे चेअरमन डॉ. अतुल भोसले यांनी दिली. आटके टप्पा (ता. कराड) येथील विराज मल्टिपर्पज हॉलमध्ये आयोजित बँकेच्या ५१ व्या वार्षिक सर्वसाधारण सभेत ते बोलत होते.

बँकेचे मार्गदर्शक तथा य. मो. कृष्णा सहकारी साखर कारखान्याचे चेअरमन डॉ. सुरेश भोसले यांच्या प्रमुख उपस्थितीत आणि डॉ. अतुल भोसले यांच्या अध्यक्षतेखाली पार पडलेल्या या सभेच्या व्यासपीठावर उपाध्यक्ष दामाजी मोरे, ज्येष्ठ संचालक शिवाजीराव थोरात, मुख्य कार्यकारी अधिकारी चंद्रकांत कापसे यांच्यासह कृष्णा कारखान्याचे संचालक निवासराव थोरात, बाबासो शिंदे, जे. डी. मोरे, शिवाजी पाटील यांची प्रमुख उपस्थिती होती.

कराड : कृष्णा बँकेच्या सर्वसाधारण सभेत बोलताना चेअरमन डॉ. अतुल भोसले. बाजूस डॉ. सुरेश भोसले, दामाजी मोरे यांच्यासह संचालक मंडळ.

सभेत बोलताना डॉ. अतुल भोसले म्हणाले, की सहकारमहर्षी जयवंतराव भोसले आप्पांनी १९७१ साली कृष्णा सहकारी बँकेची स्थापना केली. ५१ वर्षांपूर्वी स्थापन झालेल्या या बँकेने या भागातील लोकांचे संसार उभे करुन, समाजाला स्थैर्य मिळवून दिले. १९८९ च्या संघर्षाच्या काळात बँकेचे अस्तित्व धोक्यात आले असताना, डॉ. सुरेशबाबांनी आपल्या कुशल कार्यपद्धतीने बँकेला वाचविण्याचे काम केले. सभासदांनी दिलेल्या पाठिंब्यामुळे व विश्वासामुळे बँकेने उत्तम प्रगती केली असून, गेली सलग १० वर्षे बँकेचा नेट एनपीए शून्य टक्के राहिला आहे. गेल्या आर्थिक वर्षात बँकेने ७३९ कोटींचा व्यवसाय टप्पा पार केला असून, ३१ मार्च २०२२ अखेर बँकेकडे ४८८ कोटींच्या ठेवी आहेत; तर बँकेने २५१ कोटींचे कर्जवितरण केले आहे. तसेच बँकेकडे ८५ कोटींचा राखीव निधी असून, येत्या मार्चअखेर तो १०० कोटींपर्यंत नेण्याचे उद्दिष्ट आहे. बँकेने मिळविलेल्या नफ्याच्या अनुषंगाने सभासदांना १० टक्के लाभांश देण्याचा निर्णयही संचालक मंडळाने घेतला आहे. सामान्य माणसांसाठी कार्य आणि सभासद हिताचा कारभार या आप्पांनी दिलेल्या शिकवणीनुसार बँकेची वाटचाल सुरु असून, बँकेने ४ जिल्ह्यात शाखाविस्तार केला आहे. बँकेच्या प्रगतीत सेवकांचे योगदानही महत्वपूर्ण असून, सेवकांच्या हितासाठी बँकेने अनेक धोरणात्मक निर्णय घेत पगारवाढ, बोनस यासह प्रोत्साहनपर भत्त्याच्या रुपाने चांगले आर्थिक पाठबळ उपलब्ध करुन दिले आहे. कृष्णा बँकेसह सहकारमहर्षी जयवंतराव भोसले सहकारी पतसंस्था, कृष्णा महिला सहकारी पतसंस्था व वित्तपेठा अशा संस्थाचा मिळून तयार झालेल्या कृष्णा आर्थिक परिवाराने ३१ मार्च २०२२ अखेर १२५० कोटींचा व्यवसाय टप्पा पूर्ण केला असून, येत्या मार्चअखेर १५०० कोटी व्यवसायपूर्तीचे उद्दिष्ट निश्चित करण्यात आले आहे. 

डॉ. सुरेश भोसले म्हणाले, की गेल्या ५१ वर्षात बँकेच्या वाटचालीत अनेक चढउतार आले, पण प्रत्येक संकटावर मात करत कृष्णा बँक आज प्रगतीपथावर पोहचली आहे. बँकिंग क्षेत्रात तंत्रज्ञानाचा वापर वाढत चालला आहे. या सर्व नव्या गोष्टींचा अवलंब करत, कृष्णा बँक पुढे वाटचाल करत आहे. सभासद व ग्राहकांच्या विश्वासाला पात्र राहून कार्य करत असल्यानेच आज कृष्णा बँकेचा मोठा विस्तार झाला आहे.

सभेला कृष्णा बँकेचे संचालक प्रमोद मारुती पाटील, रणजीत लाड, हर्षवर्धन मोहिते, नामदेव कदम, प्रदीप थोरात, विजय जगताप, प्रकाश पाटील, गिरीश शहा, शिवाजी पाटील, संतोष पाटील, अनिल बनसोडे, नारायण शिंगाडे, श्रीमती सरिता निकम, सौ. सारिका पवार, ॲड. विजय पाटील, व्यवस्थापन मंडळाचे अध्यक्ष सचिन तोडकर, सदस्य गुणवंत जाधव, हणमंतराव पाटील, प्रमोद गुणवंतराव पाटील, सुनील पाटील, प्रदीप पाटील, माजी संचालक बाळासो पवार, महादेव पवार, चंद्रहास जाधव, तातोबा थोरात, दिनकर गडाळे यांच्यासह सभासद उपस्थित होते.